Paplajahan 3: (Kaslametan miwah Dame wenten ring Sang Hyang Tunggal)
Daniel 6:1-28
3
Sasampun Raja Belsyasar padem,
Raja Darius,
anak lianan saking Wawidangan Media nerima tahta karajaane.
Duk punika ida mayusa nem dasa kalih (62) tiban.
Raja Darius nyahcah karajaannyane dados satus duang dasa (120) propinsi sane suang-suang kapimpin olih gubernur.
2 Tur dane Daniel miwah kalih anak lianan kaangkat buat ngawasin para gubernure punika mangda raja nenten karugiang.
3 Raris kacingak pakaryan dane Daniel becikan bandingang kapining pakaryan para gubernur miwah para pengawas sane lianan.
Punika mawinan,
raja meled mangdane ngangkat dane dados penguasa ring saluirin karajaan.
4 Nanging para gubernur lan para pengawase punika ngrereh kaiwangan-kaiwangan dane Daniel ring tugas pemrentahan.
Sakewala ipun nenten ja polih kaiwangan danene,
krana dane satya lan jujur samaliha nenten ja mimpas tekening tugas utawi malaksana iwang.
5 Raris ipun sami mabaos,
“Iraga tuah nyidang ngalih kapelihan I Daniele unduk ane ada urusane ajak awig-awig Sasembahane.”
6 Krana ipun uning yening Raja Darius punika seneng kaajumang,
raris ipun sami tangkil ring arepan idane tur matur,
“Duh ratu Raja Darius,
maurip ja iratu salamin-laminne!
7 Titiang sami sane ngurus karajaan iratune nenten tios para pengawas,
para gubernur,
para wakil gubernur,
para bupati,
miwah pejabat-pejabat sane lianan,
sampun pada adung ngusulang mangdane iratu ngamedalang surat prentah sane musti seken-seken katinutin.
Mangdane iratu mrentahang yening ring tigang dasa dinane niki,
nenten dados nunas ica ring dewa utawi manusa,
lianan kapining iratu,
sang Raja Darius kamanten.
Sapa sira ja sane nglanggar prentahe punika jagi kaentungang ka tengah goa singane.
8 Titiang sami nunas mangdane iratu neken surat prentahe punika mangdane dados undang-undang Media lan Persia sane nenten mresidayang kaubah malih.”
9 Raris Raja Darius neken surat prentahe punika.
10 Risedek dane Daniel mirengang indike punika,
dane budal ka jeronnyane.
Kamarnyane sane ring baduur,
madaging jendela-jendela sane marep kota Yerusalem.
Irika sekadi biasane,
dane nunas ica kapining Sasembahan danene,
inggih punika Sang Hyang Pengardi,
lan ngagungang Ida ping tiga awai saha matimpuh ring arepan jendela-jendela sane mabukak punika.
11 Ritatkala musuh-musuh danene nyingakin dane nunas ica kapining Sasembahan danene,
12 ipun sami tangkil ring arepan raja jagi masadu indik dane Daniel punika.
Ipun matur,
“Nenten ke iratu sampun neken surat prentah larangane?
Daging surate punika:
ring tigang dasa dinane puniki nenten dados nunas ica ring dewa utawi manusa,
lianan kapining iratu,
Raja Darius.
Samaliha sapa sira ja sane nglanggar jagi kaentungang ka tengah goa singane.”
Raja nyaurin,
“Mula saja,
prentahe ene dadi undang-undang Media lan Persia ane tusing nyidang kaubah buin.”
13 Raris ipun sami matur ring raja,
“Daniel,
salah tunggal tawanan saking Yehuda punika nenten satinut ring iratu miwah prentah iratune.
Ipun tetep seleg nunas ica ping tiga awai.”
14 Mirengang indike punika,
raja dados sungsut lan sengsaya.
Punika mawinan ida ngrereh daya mangda nylametang dane Daniel.
Kantos sore ida kari mineh-minehang daya mangda sida nulungin dane.
15 Irika raris para gubernur lan pengawase mawali malih tangkil ring raja tur mabaos,
“Duh ratu,
mangdane iratu eling yening manut undang-undang Media Persia,
prentah sane kamedalang raja nenten dados kaubah-ubah.”
16 Pamuputne Raja Darius mrentahang mangdane dane Daniel kabakta lan kaentungang ka tengah goa singane.
Pengandikan rajane kapining dane Daniel sekadi puniki,
“Duh Daniel,
ragane satya mabakti kapining Sasembahan ragane,
dumogi ja Ida nylametang ragane.”
17 Sasampune kenten,
kagenahang batu gede ring duur goane punika,
tur raja ngicen cap karajaan lan cap para pengede,
kantos nenten wenten anak sane mresidayang mebasang dane Daniel saking singa-singane punika.
18 Irika raris Raja Darius budal ka purinnyane.
Tur ida mapuasa apetenge punika;
ida nenten ngicen para pengibure tangkil mrika.
Irika ida nenten mresidayang sirep.
19 Ritatkala semeng ngremeng,
raja matangi lan gelis-gelis luas ka goa singane.
20 Sasampune rauh irika,
ida mageluran antuk suara ngejer kapining dane Daniel,
“Daniel,
pengayah Sang Hyang Pengardi sane urip!
Apake Sasembahan ragane ane satya ayahin ragane ento,
suba nyidang nylametang ragane uling singa-singane ento?”
21 Raris pirengina suaran dane Daniel masaur,
“Dumogi ja iratu maurip salamin-laminne!
22 Sasembahan titiange sampun ngutus malekat Idane mangda nutup bungut singa-singane punika kantos ia nenten sida ngudiang-ngudiang titiang.
Sang Hyang Pengardi nylametang titiang krana Ida uning yening titiang nenten malaksana iwang kapining Ida miwah kapining iratu.”
23 Raris liang pisan manah rajane lan ida mrentahang mangdane dane Daniel kaangkat saking goane punika.
Sasampune prentahe punika kalaksanayang,
irika nenten ja kapanggihin bered neng akidik ring dane Daniel,
krana dane pracaya kapining Sasembahan danene.
24 Irika raris raja mrentahang anak mangda ngejuk anak sane masadu indik dane Daniel.
Tur anake punika sareng anak alit lan rabin ipune kaentungang ka tengah goa singane punika.
Sadereng ipun neked ka dasar goane punika,
singa-singane punika sampun nyagrep ipun lan ngremukang tulang-tulang ipune.
25 Sasampune punika Raja Darius ngirim surat kapining anake saking sekancan bangsa,
soroh bangsa,
lan basa ring saluirin jagat,
“Salam rahayu!
26 Nira mrentahang kapining anake sami sane wenten ring wawidangan karajaan nirange mangdane jejeh lan subakti kapining Sasembahan dane Daniele!
Ida punika Sang Hyang Pengardi sane urip salamin-laminne,
kantos salamine Ida mamrentah.
Karajaan Idane nenten ja jagi runtuh.
Kuasan Idane kantos salamin-laminne.
27 Ida nylametang lan mebasang,
tur makarya paindikan sane ngangobin ring langit lan gumine.
Dane Daniel sampun kaslametang olih Ida,
saking sagrepan bungut singa-singane.”
28 Sekadi asapunika dane Daniel tetep madue jabatan tegeh salamin jaman pemrentahan Raja Darius miwah pemrentahan Raja Kores saking Negeri Persia.
Pilipi 4:6-7
6 Sampunang ja semeton mapineh abot tur jejeh indik napi-napi, nanging nunas ica ja semeton ring Sang Hyang Pengardi. Aturang ja pinunas semetone lan matur suksma ja ring Ida.
7 Dame sutrepti saking Sang Hyang Pengardi jagi nyaga ati lan papineh semetone ring Sang Hyang Kristus Yesus.
Dame sutreptine punika luihan bandingang papineh utawi pangresepan manusane!
Penuntun mabligbagan ring pasamuan
1.
Ngaturang penyuksma.
“Ngiring ja iraga ngaturang suksma mangkin.
Semeton jagi ngaturang suksma indik napi?"
2.
Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3.
Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii “Napi sane plajahin iraga indik anake sane satya kapining Sang Hyang Tunggal ring ceritane puniki?”
iv. “Punapike carane iraga nglaksanayang pengajahane puniki ring urip iragane suang-suang?”
v. “Kapining sirake sapatutne iraga nyeritayang malih ceritane puniki?”